專注力訓練 － lego

今晚，我放棄左跑步既時間陪喬喬玩lego。

由於老師開學無耐就同我講，喬喬係學校非常唔專心，所以我唯有非常關注呢件事。

要我同其他家長一樣玩字卡，學野，我怕我自己都會悶死，所以玩lego同油顏色係唯一令我同喬喬一齊訓練專注力既最佳方法。（本人亦非常專注力不足，同我熟既朋友都知，傾傾下呢野，又會傾左第二樣）

今晚，如常咁砌lego，睇得出喬喬好眼訓，但既然講好左要砌就要完成佢，唔可以做到一半走。成個過程非常漫長，如果我砌，應該5－10分鐘砌完。但我今次只係幫佢分好顏色，同埋幫佢揭說明書，佢自己慢慢攪，足足攪左50分鐘先砌完。（媽咪自己走左去訓覺。(.\_/.))

過程入面，要不停咁帶番佢去睇說明書，又要提佢邊舊打邊舊。最重要既係，我要好忍手，因為我都好眼訓，想快d收工。但如果我自己做，又浪費左呢d訓練機會。

砌到中間，有一兩舊佢砌錯左，我特登唔提佢，點知佢好快就發現自己砌錯左。果一刻我真係好開心呢！其實我成日提自己，要俾機會佢做錯野，下下帶住佢，佢永遠都唔會長大。但人係心急既，好多時為左快d完成，我地都會幫佢完成。例如食飯同刷牙，到而家我地都仲要成日幫手。-_-||

不過今晚，我做到了。

到完成後，喬喬自己都好開心，因為呢個lego完完全全係佢砌既，而我只係當佢唔夠力果時，出隻手指幫佢壓一壓。


－－－－－－－－－－－－－－－－

前兩日聽收音機，提到有一種叫做八爪魚家長。意思係，個家長本身都好忙，點樣再抽時間去做親子活動。我無意對號入座，因為我唔算係好忙，亦唔算好多親子活動。但佢入面有一小段，我都想quote番出來。

佢提到，有d小朋友覺得爸爸只係一個司機，因為爸爸永遠都只係車佢去學野。其實你開車15分鐘去俾佢同人地（老師）建立45分鐘感情，點解唔自己用晒60分鐘去同小朋友建立感情呢？有d野係唔係一定要人教？唔可以自己教呢？

我非常同意，由其係見到好多小朋友學野學到玩都無時間玩果時，我覺得我對得住喬喬有餘，第日讀書叻唔叻佢自己既事，至少我俾左一整個“爸爸“同埋快樂既童年俾佢。