呢兩日，對於喬喬來講，可以話係人生既一個里程碑，由學前班進入正式幼稚園K1既課程。
學校好貼心，頭三日安排左適應班等小朋友可以同家長一齊接觸呢個新環境。對於我來講，亦係一個新體驗！校車，幼稚園上課都係新鮮事！我諗無咩人會清楚記得自己幼稚園生活係點過呀！
昨日老婆參加左第一日上課後，我亦主動提出由我去跟第二日既課。 其實，我一直無擔心過喬喬會有咩適應問題，因為我覺得佢同陌生人相處，佢會有佢既方法。（九唔搭八吹水大法）
今日準時上到校車，校車姨姨就為我打左口強心針！
佢話：“呢個小朋友認得部車喎！仲同我地招呼！“
之後阿姨細細聲同我講：“好呀，起碼佢唔怕我地“
到左課室，我見到兩個老師，一個係外籍老師，一個係“國語“老師。（因為我唔知佢係邊度人，但都幾肯定普通話係佢母語）
喬喬即時沉迷係桌上面既玩具，我亦有得佢慢慢玩。 兩位老師主動同喬喬聯絡感情，喬喬都係“冷傲與熱情之間“，有興趣就答下，無興趣又再玩。
到左正式上課既時候，戲肉就出現了。
老師話，今日家長需要坐去課室既後排。
宇喬見到咁既情況，竟然好不客氣咁話，“唔得！“
我：“爸爸坐去後面，唔係走“
“唔得！“
我：“我係後面。。。“
“唔得！我會食晒d位，等家長無得坐“
老師，好啦，宇喬爸爸坐係宇喬既對面啦。
我見到喬喬眼濕濕。但我知道佢發生咩事，由細到大，每一次父母陪佢參加習體活動，佢都會好唔合作，作出好多反抗行為，試過爆喊，鬧人，唔出聲，唔做等等。
其實佢係怕係我地面前俾人讚，人地讚佢佢會好唔中意，但只係有我地出現果時先會咁。佢好清楚做咩行為會有人讚佢，佢會特登唔做。
但上年n班老師同我地講，其實平時喬喬係好正常，平時都會參加活動，亦唔會反抗。仲會接受到老師同學既讚美。但我地一出現就有問題，呢個問題真係困擾左我好耐。
更奇怪既係，我地平時讚佢，佢又會好開心喎，有時仲會特登做d野出來等我地讚佢，仲會提我地佢做左咩好事，等地我讚。
我今日真係好想問老師，其實我可唔可以出去？如果我出去，佢會變成另一個人。
當然我無咁做到，因為我知道咁對佢既傷害好大。
有無人可以教下我應該點做？其實係唔係要搵d專家幫下手？
佢今日做完勞作行埋來要我like佢。
沒有留言:
張貼留言